ସମ୍ପାଦକୀୟ 

        ଶିଶୁ ହସିଲେ ଦୁନିଆଁ ହସେ ବାକ୍ୟ ଟି ପ୍ରାଣଠୁ ଅଧିକ ମଧୁର ଲାଗେ । ଶିଶୁ ସାହିତ୍ୟକୁ ଭଲ ପାଉଥିବା ସାହିତ୍ୟ ସ୍ରଷ୍ଟା, ଶିକ୍ଷକ/ଶିକ୍ଷୟିତ୍ରୀ ମାନଙ୍କୁ ମୋର ଭୂମିଷ୍ଠ ପ୍ରଣାମ ଜଣାଇବା ସହ ମୋର କୁନି କୁନି ଛାତ୍ରଛାତ୍ରୀ ଓ ଶିଶୁ ସାହିତ୍ୟିକ ମାନଙ୍କୁ ସ୍ନେହଭରା ଆଶୀର୍ବାଦ ଜଣାଉଛି । ସାହିତ୍ୟ ହେଉଛି ସମାଜର ଦର୍ପଣ ଓ ମାନବ ଜୀବନର ମୃତ୍ୟୁ ସଂଜୀବନୀ । ମା’ ଟିଏ ମାତୃଭାଷା କୁ ବଞ୍ଚାଇ ରଖିପାରେ ନିଜ ଶିଶୁ ଦ୍ଵାରା, ମା’ ଟିଏ ଚାହିଁଲେ ମା’, ମାଟି ଓ ମାତୃଭାଷା ସୁରକ୍ଷିତ ରହିପାରିବ। ଭାଷା ହେଉଛି ଆମ ପରିଚୟ, ଭାଷା ହେଉଛି ଆମ ଗର୍ବ ।

    ବର୍ତ୍ତମାନ ବୈଦ୍ୟୁତିକ ଯନ୍ତ୍ର  ଯୁଗରେ ଶିଶୁ ମାନଙ୍କ ଆଗ୍ରହକୁ ଦୃଷ୍ଟିରେ ରଖି ଶିଶୁ ସାହିତ୍ୟ ପାଣ୍ଡୁଲିପି କୁ ଆମେ ଶିଶୁ ସାହିତ୍ୟ ଇ-ପତ୍ରିକା ମାଧ୍ୟମରେ ପିଲାମାନଙ୍କ ନିକଟର ପହଞ୍ଚାଇବାକୁ  ଚେଷ୍ଟା କରିଛୁ । ପବିତ୍ର ରଥଯାତ୍ରାରେ ଆମ “ଶ୍ରୀ ରାଧାକୃଷ୍ଣ ସାହିତ୍ୟ ସଂସଦ“ ସାହିତ୍ୟ ସମାଜ ସଂସ୍କାରକ ଭାବରେ ପିଲାମାନଙ୍କ ଦ୍ଵାରା କିପରି ଆମ ଭାଷା ସାହିତ୍ୟକୁ ଚିର କାଳ ପାଇଁ ବଞ୍ଚାଇ ରଖିବାକୁ ଗୋଟିଏ ଛୋଟିଆ ପ୍ରୟାଶ  ମାତ୍ର । ଆଜିର ଆଧୁନିକ ଇଣ୍ଟରନେଟ ଯୁଗରେ ପିଲାମାନଙ୍କର ବୈଷୟିକ ଜ୍ଞାନ କୌଶଳ ଉପରେ ବେଶ ପାରଦର୍ଶିତା ଅନୁଭବ କରି ମୋବାଇଲ୍, ଟାବଲେଟ ଓ କମ୍ପୁଟରରେ କିପରି ସମୟ ନଷ୍ଟ ନକରି ବଳକା  ସମୟରେ ଶିଶୁ ସାହିତ୍ୟ ପତ୍ରିକା ମାଧ୍ୟମରେ କିଛି ଜ୍ଞାନ ଆହାରଣ କରିବେ ଓ ଆମ ଭାଷା ସାହିତ୍ୟ ଓ କଳା  ସଂସ୍କୃତିକୁ ବଞ୍ଚାଇ ରଖିବେ ଏହା  ଆମର ଆଶା  ।

    ଶିଶୁ ସାହିତ୍ୟିକମାନେ କିଶୋର/କିଶୋରୀମାନେ ନିଜ ମନର ଭାବନକୁ କବିତା, ଗଳ୍ପ ଓ ପ୍ରବନ୍ଧ ଇତ୍ୟାଦି ପ୍ରକାଶ କରିବାର ସୁନ୍ଦର ମାଧ୍ୟମ ହେଉଛି ଏହି ଶିଶୁ ସାହିତ୍ୟ ପତ୍ରିକା ।   ବୈଷୟିକ ଜ୍ଞାନ କୌଶଳ ମାଧ୍ୟମରେ ଶିଶୁ ସାହିତ୍ୟ ଇ-ପତ୍ରିକାକୁ ଆପଣେଇବେ ନିଶ୍ଚିନ୍ତ ମନେ ହୁଏ, ଶିଶୁ ସାହିତ୍ୟିକ ମାନଙ୍କୁ ପ୍ରେରଣା ପ୍ରଦାନ କରିବା ଏବଂ ସେମାନଙ୍କ ଦ୍ୱାରା ଆମ ଭାଷା ସାହିତ୍ୟିକୁ ବିଶ୍ଵ ଦରବାରେ ପ୍ରତିଷ୍ଠା କରିବା ପାଇଁ ପ୍ରେରଣା ପ୍ରଦାନ କରିବାକୁ ଆମେ ଚେଷ୍ଟା କରୁଛୁ।

    “ମାତା” ଶିଶୁ ସାହିତ୍ୟ ଇ-ପତ୍ରିକା କେବଳ ଏହା ପତ୍ରିକା ନୁହେଁ, ବରଂ ଏହା ଶୈଶବରୁ ବୟସର ଅପରାହ୍ନ ପର୍ଯନ୍ତ ଗୋଟେ ଭାଷା ସାହିତ୍ୟ ଆନ୍ଦୋଳନର କର୍ଣ୍ଣଧାର ସାଜିବ, ଏକ ବୈପ୍ଳବିକ ପରିବର୍ତ୍ତନ ଯାହା ଓଡ଼ିଆ ଭାଷାକୁ ଆଧୁନିକ ଯୁଗ ସହ ତାଳ ଦେଇ ପ୍ରତିଦିନ ବୃଦ୍ଧିପାଉଥିବା ଅନଲାଇନ୍ ସାମାଜିକ ଗଣମାଧ୍ୟମ ମାଧ୍ୟମରେ ଓଡ଼ିଆ ଶିଶୁ ସାହିତ୍ୟିକ ମାନଙ୍କୁ ସାହିତ୍ୟ ପ୍ରତି ରୁଚି କୁ ଆଦୃତ କରାଇବାରେ ସମର୍ଥ ହୋଇପାରିବ । ବିଶ୍ବବ୍ୟାପୀ ଅନେକ ଦେଶରେ ବସବାସ କରୁଥିବା ଓଡ଼ିଆ ପିଲା ମାନଙ୍କୁ ପ୍ରତିମାସରେ ଏକ ରୁଚିକର ଓଡ଼ିଆ ଶିଶୁ ସାହିତ୍ୟ ଇ-ପତ୍ରିକା ପାଠ କରିବାର ନିଶୁଳ୍କ ବିକଳ୍ପ ଉପଲବ୍ଧ କରାଇବା ସହ ଓଡ଼ିଆ ଇ-ପତ୍ରିକା ଜଗତରେ ଏହା ନୂତନ ଅଧ୍ୟାୟ ସୃଷ୍ଟି କରିବ ମୋର ଆଶା ଓ ବିଶ୍ବାସ।

   “ଶ୍ରୀ ରାଧାକୃଷ୍ଣ ସାହିତ୍ୟ ସଂସଦ” ପକ୍ଷରୁ ଆତ୍ମ ପ୍ରକାଶ କରିଛି "ମାତା" ଶିଶୁ ସାହିତ୍ୟ ଇ-ପତ୍ରିକା । ଏହା ଓଡ଼ିଆ ଭାଷା ସାହିତ୍ୟ, ସଂସ୍କୃତି ପରମ୍ପରା ଓ ଐତିହ୍ୟକୁ ଏହି ଇ-ପତ୍ରିକା ମାଧ୍ୟମରେ ଶିଶୁ ସାହିତ୍ୟ ଲେଖକ ଲେଖକାମାନଙ୍କୁ ପୁନଃରୁଦ୍ଧାର କରି ମାଟି ମାଆ ପାଇଁ ଗର୍ବ ଗୌରବ ଆଣି ପାରିବ । ଆମ ଅନୁଷ୍ଠାନର ଶିଶୁ ସାହିତ୍ୟ ଇ-ପତ୍ରିକାର ସର୍ବାଙ୍ଗୀନ ବିକାଶ ଓ ଉନ୍ନତି ପାଇଁ “ଶ୍ରୀ ରାଧାକୃଷ୍ଣଙ୍କ” ପାଦ ପଙ୍କଜରେ ଏହି “ମାତା” ଶିଶୁ ସାହିତ୍ୟ  ଇ-ପତ୍ରିକାକୁ ସମର୍ପଣ କରୁଛି। ଆଶା କରୁଛି ଆପଣମାନେ ଏହାକୁ ପାଇବା ପରେ ନିଜେ ପଢ଼ିବା ସହିତ ପିଲାମାନଙ୍କୁ ଓ  ଅନ୍ୟମାନଙ୍କୁ ପଢ଼ାଇବା ପାଇଁ ପ୍ରଚେଷ୍ଟା କରିବେ ଏବଂ ଛାତ୍ରଛାତ୍ରୀଙ୍କୁ ପ୍ରେରଣା ଦେବାକୁ ବିନମ୍ର ଅନୁରୋଧ କରୁଛି।

ଅତୁଳା ମୋନାଲିସା ରାଉତ

                                                     ସମ୍ପାଦିକା

    ମାତା’ ଶିଶୁ ସାହିତ୍ୟ ଇ-ପତ୍ରିକା